Adi Vaxtın On Səkkizinci Həftəsinin Bazar Ertəsi

Yəhuda padşahı Sidqiyanın səltənətinin əvvəlində, dördüncü ilin beşinci ayında, Givondan olan Azzur oğlu peyğəmbər Xananya Rəbbin evində, kahinlərin və bütün xalqın gözü qabağında mənə dedi: «Ordular Rəbbi, İsrailin Allahı belə deyir: “Bobil padşahının boyunduruğunu qıracağam. İki il ərzində Bobil padşahı Nebukadnesarın bu yerdən götürüb Bobilə apardığı Rəbbin evinin bütün qablarını bu yerə qaytaracağam. Yəhuda padşahı Yehoyaqim oğlu Yekonyanı və Bobilə gedən bütün Yəhuda sürgünlərini bu yerə qaytaracağam,” Rəbb bəyan edir, “çünki Bobil padşahının boyunduruğunu qıracağam”». Peyğəmbər Yeremya kahinlərin və Rəbbin evində duran bütün xalqın önündə peyğəmbər Xananyaya cavab verib dedi: «Amin! Rəbb elə etsin! Rəbbin evinin qablarını və bütün sürgünləri Bobildən bu yerə qaytarmaqla peyğəmbərlik etdiyin sözləri Rəbb yerinə yetirsin! Lakin indi mənim sənin və bütün xalqın eşidəcəyi bu sözə qulaq as. Qədimdən bəri mən də, sən də olmamışdan əvvəl gələn peyğəmbərlər çoxlu ölkələrə və böyük padşahlıqlara qarşı müharibə, fəlakət və taun haqqında peyğəmbərlik etmişlər. Sülh haqqında peyğəmbərlik edən peyğəmbər isə yalnız söylədiyi söz yerinə yetəndə Rəbb tərəfindən göndərildiyi bəlli olur». O zaman peyğəmbər Xananya peyğəmbər Yeremyanın boynundan boyunduruğu götürüb qırdı və bütün xalqın gözü qabağında dedi: «Rəbb belə deyir: “İki il ərzində Nebukadnesarın boyunduruğunu bütün millətlərin boynundan beləcə qıracağam”». İuda peyğəmbəri Yeremya öz yolu ilə getdi. Peyğəmbər Xananya peyğəmbər Yeremyanın boynundan boyunduruğu qırdıqdan bir qədər sonra Rəbbin sözü Yeremyaya nazil oldu: «Get, Xananyaya de: Rəbb belə deyir: “Sən taxta boyunduruğu qırdın, amma onun əvəzinə dəmir boyunduruq düzəltdin!” Çünki Ordular Rəbbi, İsrailin Allahı belə deyir: “Bobil padşahı Nebukadnesara qulluq etsinlər deyə bütün bu millətlərin boynuna dəmir boyunduruq qoymuşam və onlar ona qulluq edəcəklər; çöl heyvanlarını da ona vermişəm”». Peyğəmbər Yeremya peyğəmbər Xananyaya dedi: «Eşit, ey Xananya! Rəbb səni göndərməyib və sən bu xalqda yalançı ümid yaratmısan. Buna görə Rəbb belə deyir: “Bax, Mən səni yer üzündən yox edəcəyəm; bu il öləcəksən, çünki Rəbbə qarşı qiyam təbliğ etdin”». Peyğəmbər Xananya elə o il, yeddinci ayda öldü.

R. Ya Rəbb, mənə Öz qanunlarını öyrət. Yalan yolunu məndən uzaq et, Qanununla mənə lütf göstər. R. Ya Rəbb, mənə Öz qanunlarını öyrət. Həqiqət sözünü ağzımdan tamamilə alma, Çünki Sənin hökmlərinə ümid bağlamışam. R. Ya Rəbb, mənə Öz qanunlarını öyrət. Səndən qorxanlar mənə tərəf dönsünlər, Sənin şəhadətlərini bilsinlər. R. Ya Rəbb, mənə Öz qanunlarını öyrət. Ürəyim Sənin qanunlarında kamil olsun, Ki, rüsvay olmayım. R. Ya Rəbb, mənə Öz qanunlarını öyrət. Pis adamlar məni həlak etmək üçün pusquda dururlar, Lakin mən Sənin şəhadətlərin haqqında düşünürəm. R. Ya Rəbb, mənə Öz qanunlarını öyrət. Sənin hökmlərindən kənara çıxmadım, Çünki mənə Özün öyrətdin. R. Ya Rəbb, mənə Öz qanunlarını öyrət.

İsa dərhal şagirdləri məcbur etdi ki, qayığa minib Ondan əvvəl qarşı tərəfə keçsinlər; Özü isə kütləni yola salırdı. Kütləni yola saldıqdan sonra dua etmək üçün təkbaşına dağa qalxdı. Axşam düşəndə O, orada tək idi. Qayıq isə artıq sahildən bir neçə mil aralıda dalğalar tərəfindən silkələnirdi, çünki külək əks tərəfdən əsirdi. Gecənin dördüncü keşikçiliyində İsa dənizin üstü ilə yeriyərək onların yanına gəldi. Şagirdlər Onu dənizin üstü ilə yerəyən görəndə dəhşətə gəldilər. «Bu, xəyaldır!» deyə qorxudan fəryad etdilər. Lakin İsa dərhal onlar ilə danışıb dedi: «Cəsarətli olun, Mənəm; qorxmayın». Butrus Ona cavab verib dedi: «Ya Rəbb, əgər Sənsənsə, əmr et suyun üstü ilə Sənin yanına gəlim». O dedi: «Gəl». Butrus qayıqdan düşüb İsanın yanına getmək üçün suyun üstü ilə yeriməyə başladı. Lakin küləyin güclü olduğunu görəndə qorxdu və batmağa başlayaraq qışqırdı: «Ya Rəbb, məni xilas et!» İsa dərhal əlini uzadıb onu tutdu və ona dedi: «Ey imanı az olan, niyə şübhə etdin?» Onlar qayığa minəndə külək yatdı. Qayıqda olanlar Ona səcdə qılıb dedilər: «Həqiqətən, Sən Allahın Oğlusan». Suyun o biri tərəfinə keçib Genesarit torpağına gəldilər. O yerin adamları Onu tanıyanda bütün ətraf vilayətə xəbər göndərdilər. Bütün xəstələri Onun yanına gətirdilər və yalvardılar ki, heç olmasa Onun libasının ətəyinə toxunsunlar. Toxunanların hamısı şəfa tapdı.